შერიგებისა და სამოქალაქო თანასწორობის საკითხებში საქართველოს სახელმწიფო მინისტრი ქეთევან ციხელაშვილი ევროპარლამენტში ასოცირების საპარლამენტო კომიტეტის სხდომაზე სიტყვით გამოვიდა.

სახელმწიფო მინისტრმა კომიტეტს, ოკუპირებულ ტერიტორიებზე არსებული მდგომარეობა და შერიგებისა და სამოქალაქო ინტეგრაციის საკითხებში საქართველოს ხელისუფლების სამშვიდობო პოლიტიკა  გააცნო. მან თავის გამოსვლაში ოკუპირებულ ტერიტორიებზე არსებულ სიტუაციაზე ისაუბრა. იმ მძიმე ყოველდღიურობაზე, რაც მოუგვარებელი კონფლიქტის შედეგად, გადაუჭრელ პრობლემად რჩება. აღნიშნა, რომ 2008 წლიდან, რუსეთ-საქართველოს ომის შემდეგ, მოსახლეობა, ხელოვნური გამყოფი ხაზის ორივე მხარეს, სერიოზული გამოწვევების წინაშე დგას.

მისი თქმით, რუსეთი ოკუპირებულ ტერიტორიებზე, ცხოვრების ყველა სფეროში, სრულ და ექსკლუზიურ კონტროლს ახორციელებს. ხელოვნური ბარიერები და ღობეები საოკუპაციო ხაზის გასწვრივ რეგულარულად მონტაჟდება, რაც რეგიონების იზოლაციას აძლიერებს. დასძინა, რომ მოსახლეობას შეზღუდული აქვს თავიანთ საკარმიდამო ნაკვეთებზე, სალოცავებსა თუ ოჯახის წევრთა საფლავებზე მისვლის შესაძლებლობა. აგრეთვე, შეეხო  ოკუპირებულ ახალგორსა და გალში ეთნიკურად ქართველი მოსახლეობის შევიწროების, მათთვის მშობლიურ ენაზე განათლების მიღების შეზღუდვის ფაქტებს. 

სახელმწიფო მინისტრმა  დეტალურად ისაუბრა არჩილ ტატუნაშვილის, გიგა ოთხოზორიას და დავით ბაშარული სიცოცხლის ხელყოფის შესახებ. მისი თქმით,  აღნიშნული პირებისადმი განხორციელებული ქმედებები არის პროვოკაცია მიმართული საქართველოს დეკლარირებული კურსის-  მშვიდობის და შერიგების წინააღმდეგ.

ქეთევან ციხელაშვილმა თავის გამოსვლაში განსაკუთრებული ყურადღება დაუთმო საქართველოს სამშვიდობო პოლიტიკას და აღნიშნა, რომ იგი ორიენტირებულია კონფლიქტის გადასაჭრელად მშვიდობიანი, პრაგმატული და კონსტრუქციული გზების მონახვაზე.

“სამშვიდობო პოლიტიკის ფარგლებში, შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატმა  სხვა სამთავრობო უწყებებთან ერთად, შეიმუშავა სამშვიდობო ინიციატივების ახალი პაკეტი სახელწოდებით "ნაბიჯი უკეთესი მომავლისაკენ", რომელიც მიზნად ისახავს აფხაზეთისა და ცხინვალის რეგიონის / სამხრეთ ოსეთის მოსახლეობის სოციალურ-ეკონომიკური პირობების გაუმჯობესებას, მოსახლეობის ჰუმანიტარულ საჭიროებებსა და პრაგმატულ ინტერესებზე დაფუძნებული საგანმანათლებლო შესაძლებლობების შექმნას და ეხმიანება მათ სწრაფვას განვითარებისა და უკეთესი მომავლისაკენ.

სამშვიდობო ინიციატივის პაკეტი არის საქართველოს მთავრობის შერიგებისა და ჩართულობის დღის წესრიგის ერთ-ერთი ყველაზე მნიშვნელოვანი მიმართულება, რომელიც, სხვა სამშვიდობო ინიციატივებთან და დაგეგმილ ნაბიჯებთან ერთად, ემსახურება მოსახლეობის კეთილდღეობის უზრუნველყოფას გამყოფი ხაზების ორივე მხარეს, ნდობის და მშვიდობის მშენებლობას”,-აღნიშნა ქეთევან ციხელაშვილმა.

ასოცირების საპარლამენტო კომიტეტის სხდომა თანათავმჯდომარეების, ევროპასთან ინტეგრაციის კომიტეტის თავმჯდომარის თამარ ხულორდავასა და ევროპარლამენტის წევრის, საჯად კარიმის ხელმძღვანელობით მეექვსედ გამართა. ევროკავშირ-საქართველოს ურთიერთობების განსახილველად ევროპარლამენტარებმა საქართველოს აღმასრულებელი ხელისუფლებისა და ევროკავშირის წარმომადგენელებს მოუსმინეს.

სხდომაზე პარტნიორებმა ასევე განიხილეს ასოცირების ხელშეკრულებისა და თავისუფალი სავაჭრო შეთანხმების განხორციელება, საქართველოში მიმდინარე დემოკრატიულ რეფორმები და საკონსტიტუციო ცვლილებები. იმსჯელეს მართლმსაჯულების სფეროში არსებულ მდგომარეობაზე, პარლამენტის მუშაობაში ღია მმართველობის პრინციპების დანერგვაზე და ასევე, ქვეყნის ეკონომიკური განვითარების გეგმებზე.

ასევე, ცნობილი გახდა, რომ იგეგმება საქართველოს მხარდამჭერი რეზოლუციის მიღება ოკუპირებულ ტერიტორიებთან დაკავშირებით, რომელსაც ევროპარლამენტი აგვისტოს ომთან დაკავშირებით 10 ივნისს მიიღებს.