პანკისის ხეობის მაცხოვრებლების ნაწილს ქეთევან ციხელაშვილი სახელმწიფო კანცელარიაში შეხვდა. შეხვედრას, რომელიც ერთ საათზე მეტხანს გაგრძელდა, პანკისელებმა სახელმწიფო მინისტრს ის საკითხები გააცნეს, რომელიც ხეობის მაცხოვრებლებს აწუხებს და ხელისუფლებასა და მოსახლეობას შორის კომუნიკაციის ინტენსიურობის აუცილებლობაზე გაამახვილეს ყურადღება.

შეხვედრის ერთ-ერთი მონაწილის, ისლამ გორგიშვილის განცხადებით, მათ სახელმწიფო მინისტრისგან მიიღეს პირობა, რომ ყველა რეკომენდაცია, რომელიც ადგილობრივებს აქვთ, გათვალისწინებული იქნება.

მისი თქმით: ,,იმ პროცესების მერე, რაც ხეობაში მოხდა, ეს პირველი ნაბიჯი იყო, რომელიც მოსახლეობასთან კომუნიკაციის კუთხით და ასევე, სხვა ბევრი სასიკეთო საქმისთვის გადაიდგა. იმედი გვაქვს და მივიღეთ პირობა, რომ ეს ყველაფერი შემდგომშიც გაგრძელდება.“

შეხვედრის მიმდინარეობისას სახელმწიფო მინისტრმა ხეობის მაცხოვრებლებთან საუბრის დროს ხაზგასმით აღნიშნა, რომ მზადაა ნებისმიერ საკითხზე ისაუბროს, რომელიც მათ აწუხებთ.

,,ძალიან საინტერესო და კონსტრუქციული შეხვედრა იყო. ჩვენი მხრიდან, მათი მხრიდან გამოითქვა მზაობა დიალოგზე, კომუნიკაციაზე, სრულ გახსნილობაზე, რომ განვიხილოთ ყველა თემა, რომელიც პანკისის ხეობის მოსახლეობისათვის აქტუალურია. მე, რა თქმა უნდა, მზად ვარ, რომ ხეობაში ჩავიდე და ყველას შევხვდე. ამით გავაგრძელო ის პრაქტიკა, რომელიც ხეობაში და ხეობის მოსახლეობასთან გვქონდა.

„დღევანდელი შეხვედრის მონაწილე ასევე იყო ახალგაზრდების ის ნაწილი, რომლებსაც ადრეც შევხვედრივარ. რა თქმა უნდა, ძალიან ბევრი საკითხი და თემაა, რომელიც ახალგაზრდებს განსაკუთრებით აინტერესებთ. არის ბევრი თემა, რომელიც პედაგოგებსა და მოსწავლეებს აინტერესებთ. ჩვენ გვქონდა არაერთი შეხვედრა უხუცესებთან და ძალიან მნიშვნელოვანია, რომ ამ კომუნიკაციით მოსახლეობა მთლიანად მოვიცვათ. ალბათ თარიღი და ფორმატი ზუსტად განისაზღვრება. კიდევ ერთხელ ვამბობ - არის სრული მზაობა, როგორც მათი, ასევე ჩვენი მხრიდან. მე ვფიქრობ, რომ ყველა საკითხი გადაწყვეტადია სწორედ ამ რეჟიმში-დიალოგისა და კომუნიკაციის გზით. ამას არანაირი ალტერნატივა არ გააჩნია და ბუნებრივია, ეს ჩვენი საერთო ინტერესია - პანკისის ხეობის ინტერესი იგივეა, რაც სახელმწიფო ინტერესი“-განცხადა ქეთევან ციხელაშვილმა შეხვედრის დასრულების შემდეგ.

პანკისის ხეობის მაცხოვრებლების ნაწილი სახელმწიფო მინისტრთან შეხვედრაზე საქართველოს საპატრიარქოდან მივიდა, სადაც ისინი საქართველოს კათოლიკოს-პატრიარქს, ილია მეორეს შეხვდნენ.