ლია გიგაური ლაგოდეხის მუნიციპალიტეტის სოფლების მოსახლეობას შეხვდა

19 ოქტომბერი 2019
შერიგებისა და სამოქალაქო თანასწორობის საკითხებში სახელმწიფო მინისტრის მოადგილე ლია გიგაური ლაგოდეხის მუნიციპალიტეტის სოფლებში - კაბალში, უზუნთალასა და ყარაჯალაში იმყოფებოდა, სადაც მოსახლეობას შეხვდა.

ეთნიკური უმცირესობებით დასახლებულ სოფლებში მოსახლეობამ მათ საჭიროებებსა და პრობლემებზე ისაუბრა. ხელისუფლების წარმომადგენლებს დეტალური ინფორმაცია მიაწოდეს სოფლის გამოწვევების შესახებ და მათთან ერთად პრობლემების გადაჭრის გზებზეც იმსჯელეს.

თავის მხრივ, საკანონმდებლო ორგანოს, ცენტრალური და ადგილობრივი ხელისუფლების წარმომადგენლებმა, მოსახლეობას, მათ  სოფლებსა და ზოგადად, რეგიონში დაგეგმილი პროექტები გააცნეს. შეხვედრებზე დასმულ თითოეულ კითხვას ამომწურავი პასუხი გაეცა.

„შეხვედრებზე ჩვენს თანამოქალაქეებს მაქსიმალურად მიეცათ შესაძლებლობა, რომ თავიანთ  ხედვებთან დაკავშირებით ესაუბრათ. მათი პრობლემები ძირითადად სკოლამდელი ასაკის ბავშვების საბავშვო ბაღებით უზრუნველყოფას უკავშირდება. როდესაც სოფელში 1 100 ბავშვია, ხოლო საბავშვო ბაღში მხოლოდ 60 ადგილია, რა თქმა უნდა, იგი არსებულ მოთხოვნას ვერ დააკმაყოფილებს. თემის ყველა სოფლის ყველაზე მნიშვნელოვან პრიორიოტეტად საბავშვო ბაღის მშენებლობაა განსაზღვრული.

„ასევე, არსებობს გარკვეული ინფრასტრუქტურული საკითხების გადაჭრის საჭიროება. თუმცა, შემიძლია ვთქვა, რომ ადგილობრივი მოსახლეობა მაქსიმალურად მობილიზებულია გვერდში დაუდგეს ხელისუფლებას და ის პრობლემები, რომლებიც თითოეულ სოფელს გააჩნია,ერთობლივი ძალებით მოგვარდეს.

„ჩვენთვის განსაკუთრებით მნიშვნელოვანი იყო ის ფაქტორი, რომ მოსახლეობის ინტერესი საელმწიფო ენის სწავლასთან დაკავშირებით საკმაოდ გაზრდილია. იმ პროგრამების გარდა, რომლებიც ადგილზე ფუნქციონირებს, მოსახლეობა ითხოვს დამატებითი ძალები დავახმაროთ და ყველა ასაკის მოქალაქეს სახელმწიფო ენა უფრო მაღალ დონეზე ვასწავლოთ. ეს იმას ნიშნავს, რომ დღეს,  თითოეულმა მოქალაქემ, სახელმწიფო ენის ცოდნის მნიშვნელობა გაიაზრა და ჩვენი პოლიტიკა, რომელიც ამ შესაძლებლობების მიცემასთანაა დაკავშირებული, სწორად ორიენტირებულია, სწორი მიზნები გვაქვს დასახული,“ - განაცხადა ლია გიგაურმა.

შეხვედრებს აგრეთვე ესწრებოდნენ სახელმწიფო რწმუნებული კახეთის რეგიონში ირაკლი ქადაგიშვილი, საკანონმდებლო ორგანოსა და ადგილობრივი თვითმმართველობის წარმომადგენლები.