შერიგებისა და სამოქალაქო თანასწორობის საკითხებში სახელმწიფო მინისტრის მრჩეველი ლია გიგაური ეთნიკური უმცირესობების წარმომადგენელთა ინფორმირების კამპანიის ფარგლებში, სამცხე-ჯავახეთის რეგიონს ეწვია. ლია გიგაური რეგიონის სახელმწიფო რწმუნებულთან ბესიკ ამირანაშვილთან ერთად, ქალაქ ნინოწმინდაში ადგილობრივი არასამთავრობო ორგანიზაციებისა და მედიის წარმომადგენლებს შეხვდა და მათ ვაქცინაციასთან დაკავშირებული საინფორმაციო კამპანიის შესახებ დეტალური ინფორმაცია მიაწოდა.

 

მოგვიანებით, შეხვედრები გაიმართა სოფელ განძანისა და ფოკას მოსახლეობასთან, რომელთაც სახელმწიფო მინისტრის მრჩეველმა ეთნიკური უმცირესობებისთვის მშობლიურ ენაზე, ვაქცინაციაზე საინფორმაციო ბროშურები და სამედიცინო პირბადეები გადასცა. ლია გიგაურმა აღნიშნა, რომ საინფორმაციო კამპაანიის მიზანი ვაქცინაციის პროცესის შესახებ თითოეულ მოქალაქემდე სწორი ინფორმაციის მიტანაა.

 

„სახელმწიფო მინისტრის აპარატი განაგრძობს ფართომასშტაბიან საინფორმაციო კამპანიას კოვიდპანდემიის გავრცელების პრევენციის მიზნით. ამჯერად. ჩვენ ვსტუმრობთ სამცხე-ჯავახეთის ეთნიკური მჭიდროდ დასახლებულ რეგიონს, განსაკუთრებულად კი აქცენტს ვაკეთებთ იმ დასახლებებზე, რომლებიც ცენტრიდან მოშორებულია და სადაც ქართულ ენის ცოდნასთან დაკავშირებით არსებობს გარკვეული პრობლემები. ჩვენი მიზანია დავანგრიოთ ის მითები, რომლებიც ვრცელდება ვაქცინაციის საწინააღმდეგოდ. დღეს ყველაზე აქტუალური საკითხი ვაქცინაციაა, სწორედ ამიტომ ვხვდებით მოსახლეობას და სპეციალურად მათთვის მშობლიურ ენაზე მომზადებულ საინფორმაციო ბუკლეტებს გადავცემთ. ჩვენ გვაქვს იმედი, რომ ამ მასალების გაცნობის და ჩვენთან შეხვედრების შემდეგ, მათ ექნებათ ყველა შეკითხვაზე პასუხი და მიიღებენ გაცნობიერებულ გადაწყვეტილებას, გააკეთებენ სწორ არჩევანს ვაქცინაციასთან დაკავშირებით როგორც საკუთარი, ასევე მათი ახლობლების ჯანმრთელობის დასაცავად. ჩვენი საინფორმაციო კამპანიები არის კომპლექსური ხასიათის, ძალიან ბევრ მექანიზმს მოიცავს და რა თქმა უნდა ერთ-ერთი გახლავთ ბუკლეტების დარიგება, სადაც როგორც აზერბაიჯანულ, ასევე სომხურ ენაზე, ადგილობრივი მოსახლეობისთვის გასაგებ ენაზე მომზადებულია ყველაზე აქტუალურ საკითხებთან დაკავშირებით ინფორმაცია. არცერთი წუთით არ შეგვიწყვიტავს მუშაობა ამ მიმართულებით და ჩვენ ვფიქრობთ, რომ სწორედ ამ საინფორმაციო კამპანიების დამსახურება და შედეგია ის, რომ მოსახლეობას თითოეულ ეტაპზე აქვს შესაბამისი ინფორმაცია,“-განაცხადა ლია გიგაურმა.

 

Covid-19-ის საწინააღმდეგო ვაქცინაციასთან დაკავშირებული საინფორმაციო ბროშურები საქართველოს მთავრობის ადმინისტრაციისა და დაავადებათა კონტროლის ეროვნული ცენტრის ერთობლივი თანამშრომლობითა და საქართველოს სტრატეგიის და განვითარების ცენტრის ორგანიზებით მომზადდა. საინფორმაციო მასალები კარდაკარ პრინციპით ეთნიკური უმცირესობებით მჭიდროდ დასახლებულ იმ სოფლებში დარიგდება, სადაც ინფორმაციაზე წვდომა შეზღუდულია.