შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი კახეთის რეგიონს სამუშაო ვიზიტით ეწვია. სახელმწიფო მინისტრმა რეგიონში ვიზიტი თელავის მუნიციპალიტეტში ეთნიკური უმცირესობების წარმომადგენელ ახალგაზრდებთან და სტუდენტებთან შეხვედრით დაიწყო და მათ სამოქალაქო თანასწორობისა და ინტეგრაციის სახელმწიფო პოლიტიკით განსაზღვრული სამომავლო გეგმები და სახელმწიფო მინისტრის აპარატის ახალი ინიციატივები გააცნო. თეა ახვლედიანმა ვრცლად ისაუბრა სახელმწიფო ენის ცოდნის მნიშვნელობაზე, რაც სამოქალაქო ინტეგრაციის ძირითად ინსტრუმენტს წარმოადგენს. სახელმწიფო მინისტრმა აღნიშნა, რომ ახალი 2021-2030 სტრატეგიის ფარგლებში, განსაკუთრებული ყურადღება ახალგაზრდებისა და ქალების მხარდაჭერასა და გაძლიერებას დაეთმობა. შეხვედრა ინტერაქციულ რეჟიმში წარიმართა, საუბარი და მსჯელობა შეეხო სხვადასხვა აქტუალურ თემებსა და მიმდინარე პროცესებს, მათ შორის ყურადღება გამახვილდა COVID-19 პანდემიასთან დაკავშირებით ქვეყანაში შექმნილ ვითარებაზეც. თეა ახვლედიანმა ვირუსის გავრცელების პრევენციის მიზნით მიმდინარე ვაქცინაციის პროცესის მნიშვნელობაზე ისაუბრა და ახალგაზრდებს სამედიცინო პირბადეები გადასცა.