დაღუპულთა ხსოვნას დღეს, სახელმწიფო მინისტრ თეა ახვლედიანთან ერთად, პატივი მიაგეს საქართველოს პარლამენტის თავმჯდომარემ შალვა პაპუაშვილმა, საქართველოს პარლამენტის პირველმა ვიცე-სპიკერმა, დეოკუპაციის საკითხებთან დაკავშირებული დროებითი კომისიის თავმჯდომარემ გიორგი ვოლსკიმ და საკანონმდებლო ხელისუფლების წარმომადგენლებმა.

 

ერთი პირის იდენტიფიცირებული ნეშტი დიღმის ძმათა სასაფლაოზე სამხედრო პატივით, დანარჩენები კი ოჯახების სურვილის გათვალისწინებით, სხვადასხვა ლოკაციაზე, მათ შორის, საგვარეულო სასაფლაოებზე დაკრძალეს.

 

ორმხრივი, ქართულ-აფხაზური საკოორდინაციო მექანიზმის ფარგლებში, უგზო-უკვლოდ დაკარგული 13 იდენტიფიცირებული და გადმოსვენებული ნეშტიდან 4 სამხედრო, 9 კი სამოქალაქო პირია. სახელმწიფო პროგრამის ფარგლებში, უკვე 600-ზე მეტი ადამიანია მოძიებული, 240-ზე მეტი იდენტიფიცირებული, ხოლო უგზო-უკვლოდ დაკარგულად 2000 პირი მიიჩნევა.

 

„პირველ რიგში მსურს, კიდევ ერთხელ მივაგო პატივი, ჩვენი ქვეყნის ერთიანობისთვის და ტერიტორიული მთლიანობისთვის დაღუპულ ყველა მამულიშვილთა ხსოვნას. დღეს, აფხაზეთის ოკუპირებული რეგიონიდან გადმოსვენებული 4 სამხედრო და 9 სამოქალაქო პირი დაიკრძალება საქართველოს სხვადასხვა რეგიონში, ოჯახების გადაწყვეტილებით საგვარეულო სასაფლაოებზე. ოთხივე მებრძოლი სამხედრო პატივით დაიკრძალება, მათ შორის ერთ-ერთი დიღმის ძმათა სასაფლაოზე. 90-იანი წლების შეიარაღებული მოქმედებების და 2008 წლის რუსეთ-საქართველოს ომის შედეგად, უგზო-უკვლოდ დაკარგული პირების მოძიების, იდენტიფიცირების და ოჯახებისთვის დაბრუნების პროგრამა არის ჩვენი სახელმწიფო პოლიტიკის ერთ-ერთი მნიშვნელოვანი ნაწილი, რომელსაც წითელი ჯვრის საერთაშორისო კომიტეტის მხარდაჭერით, ჩვენ კიდევ უფრო გავაძლიერებთ და რა თქმა უნდა, განვაგრძობთ, მათ შორის, სახელმწიფო უწყებების როლის და მნიშვნელობის გაზრდის გზით. ჩვენ ძალიან დიდი იმედი გვაქვს, რომ ეს გაურკვევლობა, ამ ხანგრძლივი მოლოდინის დასასრული, მცირედ ნუგეშს მაინც მიანიჭებს ამ ოჯახებს. ჩვენი მხრივ, საქართველოს მთავრობა გაერთიანებული ძალისხმევით, კოორდინირებული მოქმედებებით, ყველაფერს გავაკეთებთ იმისთვის, რომ მსგავსი ტრაგედიები აღარ განმეორდეს ჩვენ ქვეყანაში, ხოლო ის რაც დღეს გვაქვს სახეზე, ამ ომის მძიმე შედეგები, მოგვარდეს მხოლოდ და მხოლოდ მშვიდობით, ნდობის აღდგენით და შერიგებით,“- განაცხადა სახელმწიფო მინისტრმა თეა ახვლედიანმა.