სახელმწიფო მინისტრმა მემორიალთან შეკრებილ დაღუპული სამხედროების ოჯახების წევრებს მიუსამძიმრა და თანადგომა გამოუცხადა.

 

„საქართველოს და მის მომავალ თაობებს, დარწმუნებული ვარ, მარად ემახსოვრებათ, შინდისში, 2008 წლის რუსეთ-საქართველოს ომის ერთ-ერთ ყველაზე მძიმე და ტრაგიკულ, უსამართლო და უთანასწორო ბრძოლაში, 17 ქართველი მებრძოლის შთამბეჭდავი გმირობის, მართლაც, უკვდავი ისტორია. შინდისის გმირებმა დაუფიქრებლად დათმეს სიცოცხლე, მაგრამ მტერს არ დაუთმეს სამშობლო, შეუპოვარი ბრძოლით იცავდნენ მის ღირსებას, ჩვენი ქვეყნის ერთიანობას, მშვიდობისთვის, სწორედ მშვიდობისთვის! საქართველოში მშვიდობის დაცვა და განმტკიცება, ომით გაყოფილი ჩვენი საზოგადოების მშვიდობიანად გაერთიანება, გამთლიანება არის ჩვენი პოლიტიკის უპირატესი მიზანი, რომლის სრულყოფილად მიღწევაც იქნება ჩვენი გმირების ღვაწლის საუკეთესო დაფასება. დღეს მე პატივს მივაგებ, ქედს ვიხრი მათი ხსოვნის წინაშე, ვუთანაგრძნობ ოჯახებს და ამავდროულად პატივისცემას ვუდასტურებ მათ სამშობლოს სიყვარულით, ასეთი სიმამაცით შთაგონებული გმირების აღზრდისთვის, რაც საამაყოა, მაგრამ ამავდროულად ნამდვილად უმძიმესი ხვედრია. დიდება ჩვენს გმირებს,“- განაცხადა სახელმწიფო მინისტრმა თეა ახვლედიანმა.

 

შერიგებისა და სამოქალაქო თანასწორობის საკითხებში სახელმწიფო მინისტრ თეა ახვლედიანთან ერთად ასევე იმყოფებოდნენ ყოფილი სამხრეთ ოსეთის ავტონომიური ოლქის დროებითი ადმინისტრაციის ხელმძღვანელი თამაზ ბესტაევი, შიდა ქართლში სახელმწიფო რწმუნებული მიხეილ შაყულაშვილი, გორის მერი ვლადიმერ ხინჩეგაშვილი და ადგილობრივი ხელისუფლების სხვა წარმომადგენლები.