უწყებათაშორისი კომისიის სხდომა სახელმწიფო მინისტრმა გახსნა და ყურადღება გაამახვილა 1990-იანი წლების შეიარაღებული მოქმედებების და 2008 წლის აგვისტოს რუსეთ-საქართველოს ომის შედეგად უგზო-უკვლოდ დაკარგულ პირთა მოძიების პროცესის, მისი შემდგომი მდგრადობის და ეფექტიანობის უზრუნველყოფის განსაკუთრებულ დატვირთვაზე, გაუჩინარებულ პირთა ბედის და ადგილსამყოფლის დადგენისა და მათი ოჯახების მხარდაჭერის თვალსაზრისით.

 

სხდომაზე, დღის წესრიგით გათვალისწინებული თემატიკის მიხედვით, განხილულ იქნა უგზო-უკვლოდ დაკარგულთა მოძიების პროცესის მიმდინარეობა, განხორციელებული საქმიანობა, აქტუალური საკითხები და სამომავლო ხედვები. ყურადღება გამახვილდა წითელი ჯვრის საერთაშორისო კომიტეტის (ICRC) სტრატეგიული კვლევის დასკვნებისა და რეკომენდაციების საფუძველზე მიმდინარე პროგრამის ტრანსფორმაციის პროცესზე, სახელმწიფო უწყებების მეტად გაზრდილ როლსა და შესაბამისი ფუნქციების განხორციელების გზებზე.

 

„უგზო-უკვლოდ დაკარგულ პირთა მოძიების სახელმწიფო პროგრამაში ჩართულ ყველა დარგობრივ უწყებასთან ერთად, დღეს ჩვენ განვიხილეთ ის მნიშვნელოვანი შედეგები, რასაც მივაღწიეთ წითელი ჯვრის საერთაშორისო კომიტეტთან ერთიანი ძალისხმევით. ასევე, ვიმსჯელეთ სამომავლო ხედვაზე, რომელიც ორიენტირებულია სახელმწიფო უწყებების როლის შემდგომ გაძლიერებაზე და პროცესში ცენტრალურ ადგილს ოჯახებს ანიჭებს, რათა კიდევ უფრო მეტი უგზო-უკვლოდ დაკარგული პირის ბედისა და ადგილსამყოფლის დადგენა და მათი ოჯახების ხანგრძლივი მოლოდინის დასრულება შევძლოთ. სწორედ ამ კონტექსტში განვიხილეთ და შევაჯერეთ ოჯახების თანადგომის ფუნქციის აღსრულების კონკრეტული გზები და უახლოეს დღეებში დაგეგმილი ღონისძიებები,“ - განაცხადა სახელმწიფო მინისტრმა თეა ახვლედიანმა