სოფელ ყარაჯალარში კორონავირუსთან დაკავშირებული რეკომენდაციების შესახებ ნაბეჭდი მასალა დარიგდება

31 ივლისი 2020

კორონავირუსთან დაკავშირებული რეკომენდაციების შესახებ ნაბეჭდი მასალა შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებელმა ლია გიგაურმა სოფელ ყარაჯალარში გასავრცელებლად სახელმწიფო რწმუნებულს ქვემო ქართლში შოთა რეხვიაშვილს გადასცა. 5000 საინფორმაციო ბროშურა ორენოვანია და ადგილორივი მოსახლეობისთვის ქართულ და აზერბაიჯანულ ენებზეა ხელმისაწვდომი. კორონავირუსთან დაკავშირებით გაცემული რეკომენდაციების შესახებ ინფორმაციის გავრცელება, ადგილობრივი თვითმმართველობების დახმარებით აქტიურად მიმდინარეობს და ნაბეჭდი მასალა ეთნიკური უმცირესობებისთვის მშობლიურ ენაზე კარდაკარ რიგდება.

საინფორმაციო მასალები საქართველოს გაეროს ასოციაციის (UNAG), „ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA), აშშ-ის საერთაშორისო განვითარების სააგენტოს (USAID) მხარდაჭრით დაიბეჭდა.

როგორც შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებელმა აღნიშნა, პროგრამაში ჩართულია როგორც ადგილობრივი თვითმმართველობა, ასევე სახელმწიფო რწმუნებულის ადმინისტრაციის წარმომადგენლები. მისივე განცხადებით, ინფორმაციის მიტანასთან ერთად, მნიშვნელოვანია მოქალაქეების დარწმუნება, რომ კორონავირუსის საფრთხე რეალურია და თითოეულ მოქალაქეზეა დამოკიდებული გავრცელდება თუ არა ვირუსი.

“დღეს ვიმყოფებით სოფელ ყარაჯალარში, მოგეხსენებათ აქ გვაქვს ინფიცირების ყველაზე მეტი შემთხვევა, 60-ს გადასცდა ინფიცირებულთა რაოდენობა. ამიტომ აქედან ვიწყებთ ამ ფაზას, რათა თითოეულ მოქალაქესთან კარდაკარ პრინციპით დავარიგოთ საინფორმაციო მასალები, რომლებიც საშუალებას მოგვცემს ჩვენც და ჩვენს მოქალაქეებსაც, რომ კიდევ ერთხელ გააცნობიერონ ის რისკები, რომლებიც ახლავს კორონავირუსის გავრცელებას და ასევე, გაითვალისწინონ რეკომენდაციები, რომლებიც აუცილებელია იმისათვის, რომ ეფექტიანი იყოს ბრძოლა კორონავირუსის წინააღმდეგოდ”,- განაცხადა ლია გიგაურმა.