- საჯარო ინფორმაცია
- სტრატეგიული დოკუმენტები
- ნოტიფიკაცია საქართველოს ოკუპირებულ ტერიტორიებზე გადაუდებელი ჰუმანიტარული დახმარების წარმართვისათვის
- ნოტიფიკაცია ოკუპირებულ ტერიტორიებზე მთავრობათაშორისი ორგანიზაციების საქმიანობისთვის
- ნოტიფიკაცია ოკუპირებულ ტერიტორიებზე არასამეწარმეო საქმიანობის განხორციელებისათვის
- ნოტიფიკაცია ოკუპირებულ ტერიტორიებზე შესვლის თაობაზე
- ჟენევის საერთაშორისო მოლაპარაკებები
- ინციდენტების პრევენციისა და მათზე რეაგირების მექანიზმი (IPRM)
თეა ახვლედიანმა საქართველოში ევროკავშირის წარმომადგენლობის ხელმძღვანელთან, კარლ ჰარცელთან შეხვედრა გამართა
24 ივნისი 2022
შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა თეა ახვლედიანმა საქართველოში ევროკავშირის წარმომადგენლობის ხელმძღვანელთან, კარლ ჰარცელთან შეხვედრა გამართა.
თეა ახვლედიანმა ელჩს მადლობა გადაუხადა, ევროკავშირის მიერ, საერთაშორისოდ აღიარებულ საზღვრებში, საქართველოს სუვერენიტეტისა და ტერიტორიული მთლიანობის მტკიცე მხარდაჭერისთვის. სახელმწიფო მინისტრმა ხაზი გაუსვა ევროკავშირის განსაკუთრებულ როლსა და აქტიური ჩართულობის მნიშვნელობას საქართველოში კონფლიქტის მშვიდობიანი მოგვარების პროცესში.
თეა ახვლედიანმა კარლ ჰარცელს შერიგებისა და ჩართულობის სახელმწიფო პოლიტიკის სტრატეგიული გადახედვის პროცესის მიმდინარეობა, განახლებული პრიორიტეტული მიმართულებები და სამომავლო ხედვები გააცნო, რაც შეხვედრის მთავარ მიზანს წარმოადგენდა. მხარეები სტრატეგიული გადახედვის ფარგლებში, ისევე როგორც სხვა აქტუალურ საკითხებზე, მჭიდრო თანამშრომლობის გაგრძელებაზე შეთანხმდნენ.
საქართველოს ევროკავშირთან ინტეგრაციის ამ უმნიშვნელოვანეს ეტაპზე, სახელმწიფო მინისტრმა ხაზი გაუსვა ევროპული პერსპექტივის მონიჭების ისტორიულ მნიშვნელობას და ქვეყნის ევროინტეგრაციის გზაზე მიღწეული პროგრესის შესაბამისად, უახლოეს მომავალში, კანდიდატის სტატუსის მიღების რწმენა გამოთქვა.
„ევროკავშირის ელჩთან ჩემი დღევანდელი შეხვედრის მთავარი მიზანი იყო ჩართულობის და შერიგების სახელმწიფო პოლიტიკის სტრატეგიული გადახედვის პროცესში განახლებული პრიორიტეტებისა და ხედვების გაცნობა, მათზე შემდგომი განხილვებისა და ფართო საზოგადოებრივი დისკუსიის წარმართვის მიზნით.
მოგეხსენებათ, ევროკავშირს განსაკუთრებული როლი აკისრია საქართველოში კონფლიქტის მშვიდობიანი მოგვარების, მათ შორის, ომით გაყოფილი საზოგადოების წევრებს შორის ნდობის აღდგენის პროცესში. სწორედ ამიტომ, დიდი მნიშვნელობა ენიჭება ჩვენს სტრატეგიულ პარტნიორებთან ინტენსიური თანამშრომლობის მჭიდრო კოორდინაციით გაგრძელებას.“ - განაცხადა თეა ახვლედიანმა.
