სახელმწიფო მინისტრმა ახალგაზრდებს აპარატის საქმიანობა, პრიორიტეტები, მიღწეული შედეგები და სამომავლო გეგმები გააცნო, რომელთა განხორციელებაში ახალგაზრდა თაობის ჩართულობის გაზრდა პოლიტიკის ერთ-ერთ უმთავრეს პრიორიტეტს წარმოადგენს. თეა ახვლედიანმა ხაზი გაუსვა სახელმწიფო პოლიტიკის ეფექტიანად განხორციელების პროცესში, ეთნიკური უმცირესობებით მჭიდროდ დასახლებული რეგიონების მოსახლეობის ინფორმირებისა და ცნობიერების ამაღლების მნიშვნელობას, მათ შორის საქართველოს ევროპული და ევროატლანტიკური ინტეგრაციის პერსპექტივების შესახებ გაამახვილა ყურადღება. სემინარის მონაწილეებს ასევე სიტყვით მიმართეს ნატოსა და ევროკავშირის შესახებ საინფორმაციო ცენტრის დირექტორმა თამარა წულეისკირმა და საგარეო საქმეთა სამინისტროს წარმომადგენლებმა.

დღის განმავლობაში დაგეგმილი ღონისძიებების ფარგლებში, სახელმწიფო მინისტრის აპარატის ინიციატივით პანდემიის პერიოდში გადაღებული ტოლერანტობისადმი მიძღვნილი კლიპის პრეზენტაცია გაიმართა, რომელსაც საპატიო სტუმრების სახელით ესწრებოდნენ სხვადასხვა სფეროს წარმომადგენლები, მათ შორის ტოლერანტობისადმი მიძღვნილი კლიპის მონაწილეები.

 

„ტოლერანტობის საერთაშორისო დღეს ვულოცავ სრულიად საქართველოს, სადაც ეთნიკური წარმომავლობით, კულტურით, ტრადიციებით, თუ მრწამსით განსხვავებული ჩვენი საზოგადოების წევრები საუკუნეების მანძილზე ღირსეულად თანაცხოვრობენ და ერთად იღწვიან ჩვენი სამშობლოს განვითარებისთვის. დღევანდელი დღე კიდევ ერთხელ გვახსენებს, რომ ურთიერთპატივისცემასა და თანასწორობის პრინციპებზე დაფუძნებული საზოგადოება დემოკრატიული სიმტკიცის მყარი საფუძველია. სწორედ ამ ღირებულებებს და ჩვენი ქვეყნის ისტორიულ უნიკალურ გამოცდილებას ემყარება სამოქალაქო თანასწორობისა და ინტეგრაციის სახელმწიფო პოლიტიკა, რომლის ერთ-ერთ უმთავრეს, მნიშვნელოვან პრიორიტეტს ახალგაზრდების საზოგადოებრივ-პოლიტიკური ჩართულობის გაძლიერება წარმოადგენს. სწორედ ამიტომ, დღევანდელ დღეს, ჩვენ აღვნიშნავთ, სამცხე-ჯავახეთის, ქვემო ქართლის და კახეთის რეგიონებიდან მოწვეულ ახალგაზრდებთან ერთად, სხვადასხვა ღონისძიებით კულტურულ-საგანმანათლებლო სემინარის ფარგლებში, რომელიც მიზნად ისახავს ჩვენი ქვეყნის ევროპული და ევროატლანტიკური პრიორიტეტების თაობაზე ახალგაზრდა თაობის ცნობიერების ამაღლებას,“- განაცხადა სახელმწიფო მინისტრმა თეა ახვლედიანმა.

 

ორდღიან სემინარში 40-მდე ახალგაზრდა მონაწილეობს. კულტურულ-საგანმანათლებლო სემინარი მოიცავს შეხვედრებს საქართველოს პარლამენტის თავმჯდომარესა და სხვადასხვა სახელმწიფო უწყების წარმომადგენლებთან, თემის ექსპერტებსა და საერთაშორისო პარტნიორებთან. ღონისძიების ფარგლებში მონაწილეები ეწვევიან ოკუპაციის მუზეუმსაც.

 

კულტურულ-საგანმანათლებლო საინფორმაციო კამპანიების ციკლი შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატისა და სსიპ ნატოსა და ევროკავშირის შესახებ საინფორმაციო ცენტრის ერთობლივი პარტნიორობით ხორციელდება, რომელსაც მხარს უჭერს ამერიკის შეერთებული შტატების სახელმწიფო დეპარტამენტი. საინფორმაციო კამპანიის მონაწილეებს სემინარის დასასრულს სერტიფიკატები და ევროსაბჭოსგან სიმბოლური საჩუქრები: ბრენდირებული მეხსიერების ბარათები და მაისურები გადაეცათ.